آواز سامان
خانم "آواز سامان" (به کُردی: ئاواز سامان) شاعر کُرد زبان، اهل اربیل است.
آواز سامان
خانم "آواز سامان" (به کُردی: ئاواز سامان) شاعر کُرد زبان، اهل اربیل است.
■□■
خاتوون "ئاواز سامان"، شاعیریکی کوردە، لە شاڕی هەۆڵیرەوە.
┄┅═✧❁💠❁✧═┅┄
(۱)
بەسەر زەوییە ڕووتەکاندا دەڕۆم
خەمەکانم پاکدەکەمەوە
وشەکانم تا ئەودیوی تاریکی درێژ دەکەمەوە.
(۲)
[دیوار]
ئەو ئاوێنانەی وردوخاشبوون
ئەو دەرگایانەی کلیلی قفلەکانیان ونبوو
ئەو چیرۆکانەی تەواو نەکران و
ڕەشەبا پەڕەکانی ڕفاندن
ئەوانەی سێبەریان دزی و
لە ژێر دڕەختێکیان ناشت
هەوری بەبارانیان
هەڵبڕیی بۆ بیابان
هەر لەوێش بەهاریان کوشت.
ئەو دەنگانەی نەبیستران و
خەمیان هەڵدایە ماڵانەوە و
تژیان کردن لە بۆنی مەرگ،
لە چاوی بە خوێن ڕژاوی
سەر تەلبەند و قەفەزەکان،
هاوارمان گوناهێکی گەورە بوو
بە دەست ئازارەوە
چی ماوە بۆ قسە کردن؟
قەسیدەیەک
بیرەوەورییەک
یا ئەو دیوارانەی تەمەنێک ئێمەیان
خستە تاریکییەوە
بە فریای یەک نەگەیشتین
ماڵئاواییمان لە خاک کرد.
(۳)
ژمارەکەت داخراوە
بەفرین دەزانی ئەوە یەکەم جارە
پەیمانی هاوڕێییەتیمان فەرامۆش بکەیت
بێ من سەفەر بکەیت
سەفەری مەرگ
ئاخ ئەو سەفەرەت چەندە برینداری کردم
چەندە فرمێسکی پێ ڕشتم
سەفەرێک پارچە پارچەی کردم
ئاخر تۆ بۆ هێندە خۆویست بوویت
بێ ئاگادارکردنەوەم
جانتای یادەوەرییەکانت لە گەڵ خۆتدا برد
جارێ زۆر قسە هەبوون بیکەین
زۆر زوو بوو ئەو ڕۆیشتنەت
ئێستا پێم بڵێ
من چیبکەم چی
چارەنووسە تاڵ و دژوارەکەت
خەتای من و تۆ نەبوو
بەڵکوو قەدەرێکی بێ ڕەحمانەی سروشتی ژیانه
هاوڕێیەکەم بنوو ئارام بنوو
دوا وشەکانی سەر تەختی مەرگت
هێشتا لە گوێمدا دەزرینگێتەوه
دوا گلاسی ئاوی دەستەکانم
هێشتا بەتاڵ نەبووە، ڕۆیشتیت
تەواوت نەکرد.
(۴)
[دۆزینەوە]
بە دەستی من بوایە
دەمزانی چۆن،
ئاسمان و زەوی ئاشتبکەمەوە!،
گەر بۆم دەکرا
لەو خاڵەی دەگەیشتین بەیەک
سووڕی گەردوونم ڕادەگرت،
بمزانیایە مرۆڤ
لەئاست جوانی سروشت
هێندە دڵڕەقەو
هەر رۆژەو گەڵای درەختێ
دەسووتێنێ و
ماڵی پاساریەکان تێک دەدا
دەمهاوێشتە دەرەوەی زەوی و
هۆش و ئاگاییم لێ دەسەندەوە،
بۆئەوەی جیهان بگۆرین
دەبێ وشەکان
لە قەفەسی زمانمان ئازاد کەین
لەشوێنک بنیشینەوە
شایانبێ بەکەشی دیدار،
هەردەم بەرێگاوەبین
تابزانین ئەو پیاسانەی دەیکەین
دەمانباتەوە ماڵ؟
یان لەناو گۆڕێکی بێ لاشە!
ڕاماندەگریت
یان هەربە ڕێگاوەین و
تینوویەتی خاکی وشکی رۆحمان
بۆ ناشکێ!؟
بستێک ئاوی مرۆڤبوون نادۆزینەوە
بۆ ئەوەی جارێکی تر ژیان
بۆ بوونەوەرە ئاوییەکان بگەڕێینەوەو
ئەوان بێنە وشکانی و
ئێمە بەخنکان!!
(۵)
[دەنگ]
لە دوورەوە دەنگێک دێ و بانگم دەکا
ژوورەکەم پڕ دەکا لە گریانی هەور،
وا دەزانی خەوتووم و
گوێم لە ئاوازی گریانت نییە!
من ئاوازێکم بۆ کۆکردنەوەی دەنگەکان،
لە کوێ دەنگی تۆ بێت
زەنگ دەگاتە گوێیەکانم و گوارەکانم دەلەرێنەوە.
(۶)
[چاوی من]
چاوی من وەرە هاویاریم بکە
گۆناکانم وشکبوون کارێک بکە
داریوش دەنگێک لە ئاسمانەوە
دەگاتە گۆێچکەکان و تێکچڕژانی ڕۆحە.
(۷)
[سپێدەیەکی تەڕ]
ئێوارەیەو، خەون بە سپێدەوە دەبینم
دەگەڕێم بۆ نەخشەی نیشتمانێک
تۆ پایتەختی بیت،
نیگایەک تێیدا باسی نەمری ژن بکەم
لەبەردەم خۆری ساردی پیاودا،
بمباتەوە بە خەیاڵێک
بۆ بەردەم مالێکی بێ دەرگا
کە بەسەر پۆلێ هێلینی پەپوولەوە بڕوانێ،
دەگەڕێم بۆ قومێ ئاوی ژیان
بۆ زەمەنێک
ئاودێری ئاوایی دڵم بکا
لەباغێکی خێر لەخۆ نەدیو!
بە دەنگێک وەکو ئاوازی خۆم
چۆن لەناو نیگاکانتدا جێمام
ئاوا
کچ و کوڕە عاشقەکان
دەماودەم
بۆ یەکتری بیگێڕنەوە،
بۆ زەمەنێک
وەکو کراسەکەی دایکم
شینی شینگێڕان بێ
بێ ئەوەی بزانێ پرسەکان بۆ کێن!
زەمەنێک نهێنییەکانم لەگەڵ خۆیدا ببا و،
شاعیرێک وەک خۆم بمنووسێتەوە.
(۸)
[چاوەکانی بوزورگ نا هی ئەو]
ئێمە لە کوێی زەویداین؟
ئەو سووڕانەوەیە ماندووی کردین،
تۆ بەدوای ناسنامەی خۆتدا وێڵی
لە کوێی ئەم نیشتمانە ونت کردووە؟
بەدوای ونبووەکاندا مەگەڕێ
سەختە دۆزینەوەیان،
ڕەنگە من ناوێکی بەجێماوی
سەرکورسی پۆلەکانی سەرەتایی بم،
تۆش یادگارییەک بیت!
من لەسەرپشتی
کوشنی ناو پاسەکان نووسیم:
شۆرش هەڵیخەڵەتاندین،
بەمێژوویەکی ساختە
شۆرشگێرەکان لە یەکەم شەڕدا مردن،
شاعیرەکان بەزۆر کەوتنە گیانی شیعرو
وشەیان خەڵتانی خوێن کرد،
کەسێ نەبوو داکۆکی لەو قەلەمە بکات
لە نێو شیعری ژنێکدا دڵی شکا،
هەر لەبەرئەوەی نەیتوانی بنووسێ
من ژنێکی ئازادم!
بە کراسێکی سپی تەنکەوە
دەم و لێوم تێر نەبوون لەو قیژانەی
ژنێتییم پڕ دەکەن لە بۆنی سنەوبەر،
لە ئەستێرەیەک دەچم
لە مەداری خۆی ترازابێ و
لە بێهودەییدا بسورێ
بسورێم تا دەگەمە بەردەرگای چاوەکانت
لەوێ دەڵێم:
نیشتمان
شۆڕش
خاک،
گشتی درۆن!.
(۹)
[ڕێگا]
بەو رێگایەدا مەڕۆ
نەکا ون بین،
نەکا گەڕانی نێو کیشوەرەکان
مەیلمان بگۆڕێ و دەریا بەشاخ بگۆڕینەوە
دەترسم پشتە مەلەی ناو ئاوی دەریاکان
شانی شیعرمان ماندووکاو زریزەیەک لەقوڵی هاوڕێیەتییمان بەربێتەوە
ئێمەش ونبین،
بەو ڕێگایەدا مەڕۆ
بانەتباتە ماڵی تەنیایی
بەو ڕێگایەدا بڕۆ
دەتباتەوەو ماڵی هەردووکمان
ماڵێکی پڕ
لەپەنجەرە
لەدرەخت
لەخۆری بەندکراو!
لەمانگی چواردەی وەک من و
لەهیلالی زەردی وەک تۆ٫
بەو رێگادا بڕۆ لەهەر چوار لاوە
دەڕوانیتە من لە
هەمان ژێر سێبەری درەختی
یەکەمین دیدار
یەکەمین ماچ،
چیتر زەمەن گاڵتە بەڕۆیشتن نەکا
بەدیوارەوە نەبین بەتابلۆ!
بەتەنافەوە نەبین بەکراس و
شاعیرێ بەسووکی نەمانگێڕێ!
(۱۰)
[سێبەری درەختەکان]
دەگەڕێم بە شوێن هەنگاوی پێیەکانتا
بەر لە خۆت سێبەرەکەت جێما
خۆزگە ئێستا لێرە دەبوویت
بەیەکەوە بەشداری ئاهەنگی درەختەکانمان دەکرد
ئەو درەختانەی تەمەنێکە هەر بە سەوزی ماونەتەوە
چەندە جوان بوو ئەو تۆقەیەی بۆت کڕیبووم بەدەستەکانت قژمت پێیهەڵدایەوە
پەنجەکانت لەقژما جێما
بیرتچوو لەگەڵ خۆتدا بیبەیت
چەندە درەوشاوە بوویت
تەنیاییمت بەخشی بە ئەستێرەکان
کە بەتەنافی ئاسمانەوە هەڵواسڕا بوون
خەیاڵ دەمباتەوە
بۆ ئەو ماچانەی کە فێری دزی کردین
فێری کردین خۆمان لە ئاوێنەکان بشارینەوە
فێر بووین بە شەرمەوە پیاسەیەک بەنێو کۆڵانی دیوارە ڕووخاوەکانی دڵدا بکەین
خەتا لە من و تۆ نییە
کە زەوی و خۆڵ باوەش بە یەکدا ناکەن
وەرزەکان لە دژی یەک هەڵدەگەڕێنەوە
تاکە خەتا ئەو خەیاڵانەن
کە ئێمە لە خۆیان دوور دەخەنەوە
خۆزیا لێرە دەبووی
زەمەنمان لە جووڵەی خۆی ڕادەگرت و زەویمان پڕ لە چاندنی داری عیشق دەکرد،
ئاهەنگی ساڵیادی درەختەکانمان بۆ ساز دەکرد
کە تەمەنێکە پارێزگاریی لە مانەوەی خۆیان دەکەن.
(۱۱)
ڕۆژی دایک
ڕۆژێکە بێ دایک
نامەیەک بۆ دایکم (غوربەت)
٢٤ ساڵ بێ تۆیی
تەنیایی لە خاک و نیشتمان،
لە ئامێزی ئارامیت،
نە گووتنی ئەو وشانە
تا ئێستا لە دیواری دڵ خۆیان حەشار داوە، کە پێویست بوو بە گۆێچکەدا بچرپێنم،
نەگووتنی لە مردنم نزیک دەکاتەوە
دایە...
تۆ نەتدەزانی
جێهێشتنی کچەکەت بە تەنیا لەو بیابانە گەورەیە چ سەختییەک و ئازارێکی زۆر ڕووبەرووی دەبێتەوە.
دایە... من ئیتر بە بێ تۆ توانای جەستە و هێزی بەردەوامیم نەماوە، ماندوو بوم لەو هەموو کەوتنانە.
دایە...
بیرمە بۆ قومێ ئاو چاوەکانت دەگێڕا و بە نیگاکانت پێت دەگوتین: تەنها بە دەستەکانی ئاواز گلاسەک ئاوم دەوێ؟ وایدەزانی خواردنەوەی بۆ هەتاهەتایێ تینوویەتیت دەشکێنێ.
بیرمە چەندە بە بێدەنگی فرمێسکەکانت لەو چاوە جوانانەت دەهاتنە سەر کوڵمە و گەردەنتەوە.
درەنگ تێگەیشتم، ئەوا فرمێسکی ئازاری جەستەت نەبوو،وەلێ بۆ من بوو...!
دوای ناشتنی تۆ،
ناشتنی مەرگی من بوو.
دایە...
بیری هەناسە و دوعاکانت دەکەم.
بیری شەونخوینی و دڵتەنگیەکانت دەکەم. بیری پەنجەکانت دەکەم، کە
نەرم نەرم بە شانەکەی دەستت بە قژمتدا دەهێنا.
بیرت دەکەم. ئەو شەو بە نیازی دیدارتم. ئەگەر بۆ ساتێکیش بێ وەرە بۆ لام توند توند بە خۆتمەوە بگرە، با بۆنی بەهەشت بکەم، تا جارێکی دیکە ئاشناببمەوە بە ژیان.
خۆشمدەوێی...
(۱۲)
[لێکچوون]
ئێمە کەوتووینەتە نێو ماڵێکی تاریکەوە،
لە پشت دەستی یەکتر گریان قوت دەدەینەوە،
خەون بەو درەختانەوە دەبینین کە چەتری سێبەرمان بۆ هەڵدەدەن
تۆ
لێگەڕێ پەنجەرەکانی ژیان بکەمەوە
ڕۆح ببەخشمەوە بە جەستەی یادەوەرییە لە خاچدراوەکان،
تاریکییەکانی نیشتمان ڕۆشن بکەمەوە
وەک دەشتێکی بێ گیا با پڕ ببینەوە لە ئەڤینی باران
مەوداکان چەندە بێ مانان
لە خەونە لەبیرکراوەکان دەچن
وەک قەرەجێک بە برینێکی قووڵەوە بەرەو تۆ هەنگاو دەنێم
بەیەکەوە ژیان بەرێ دەکەین و لە پێستی یەکتردا دەبینە ئاو
دەنگت لە گوێمدایە
بە زمانی خۆت بچریکێنە
تەنیا گۆرانیەکت دەتوانێ دڵ لەو مەرگە رزگار بکا،
ئیدی من هێزی چاو داخستنم نەماوە،
لێگەرێ وەک خاکێکی کێڵدراو
بە دەستەکانتەوە ببمە گوڵەگەنمێک.
(۱۳)
[لە ئاوێنەکەدا]
بە یەکەوە سەیری ئاوێنەمان دەکرد
کە لە ژوورەکەدا هەڵواسرابوو
زەردەخەنەمان بۆ یەکتر کرد،
نیگامان دەگۆڕیەوە،
گریاین تێر گریاین
بۆ ئەو ڕۆژانەی بە پێچەوانەی
ئاوێنەکە بینیمان
لە لای چەپی ژوورەکەدا،
تابلۆیەکی کلاسیکی هەڵواسرابوو
بە دەستی خۆم
بۆم هێنایت،
بیرتە!
ئەوە من بووم لەنێو تابلۆکەدا، نەتدەبینیم
هەمووان
لەنێو ژوورەکانی ڕۆژگاردا،
منیان دەبینی
من دەمەوێت تەنیا تۆ بمبینیت
بە دەستەکانت
تووند تووند
بە خۆتمەوە بمگریت
نەبادا،
وەک باڵندەیەکی بێ باڵ
وەک باڵندەیەکی بێ ماڵ
بکەومە
زەمەنێکی دیکە و
لە ئاوێنەیەکی دیکەوە،
هەم خۆم
هەم تۆ
ون بکەم
(۱۴)
[خاکێکی شەکەت]
من خەلکی ئاسمانم،
ئاسمان ئەندێشە ناکوژێت،
گەر بمەوێ بگەرێمەوە
ماڵێک لە خوێنی سەوز بنیاد دەنێم
ماڵێک بێ دیوار،
بێ کاتژمێر
دوور لەو دێو و درنجانەی
بەرۆکی هەناسەدانیان گرتووین!
بەدەم بۆنی گوڵەگەنمەوە
وەک باڵندە کۆچەرییەکان،
خۆم بە شیعرەکانتدا هەڵدەواسم
لە نێو لەپی دەستەکانتدا هەڵدەنیشم
شەکەت مەبە
لەو رۆژژمێرانەی
مڕۆڤ بەرەو ئاگری دەریا،
رووداوە سەیرەکان دەبەن!
دە پێم بڵێ
زەوی لە قەبر زیاتر،
چی بە مرۆڤ بەخشیوە؟
خەڵکی ئەم دونیایە
بۆ ماڵە بێ دیوارەکەم بانگهێشت دەکەم
لەوێ جوانیی هەیە،
دەتگەیێنێتە ئەو خاکەی،
پڕە لە شەکەتی
پڕە لە دڵشکان
پڕە لە دووبارەبوونەوە!
چەندجار گوتم
ژیان یارییەکە بە دەست دڕندەکان،
دڵ لە بن دیوارەکاندا دەنێژن
ئێمە لە دەرەوەی ڕۆژگارین
لە دەرەوەی ئەو کاتژمێرە شومەین،
کە خەریکی دواخستنی جوانی و سر بوونی لاشەکانە
(۱۵)
[ساڵیاد]
(بۆ دایە غوربەتم)
ئەو دایکەی لە ئاو دەچوو
ئاوازی بۆ هەموو جوڵەکانی دادەنا
هەر لە چێشتخانەکەیەوە تا گەیشتنی بەو گۆڕەی کە
سپی دەچووەوە
دایکە
لە نەبوونی تۆدا ڕۆژەکان سەخت تێدەپەڕن،
دەستێک، دڵێک، چاوێک، گوێیەک نەبوو
لە تۆ بچێت
تۆ لێرە نیت و نابینیت
ویستت دونیایەک بۆ کچەکەت دروست بکەیت و
فێری خەونی جوانت کردم،
لەگەڵ دەرکەوتەی خۆری سپێدان
هەر زوو پرسیاری خەونت لێ دەکردم
کە ئایا خەونی ئەم جارە چۆن بووە و تا چەند ڕایچڵەکاندوومی
دایکە ماندوو بووم لە بینینی ئەو هەموو خەونە
خەونی ڕاستی من تۆیت
تۆ دەبوو ئێستا لێرە بیت، بەڵام نیت و ڕۆیشتیت،
مردن دایکمت لەگەڵ خۆتدا برد.
(۱۶)
[لە دایک بوون]
تۆ بەبەردەم دنیای مندا تێپەڕیت و
خزاویتە نێوان پیتی وشەکانم، تاکوو
وێنە جوانەکانی برینم لە خۆتدا هەڵبگریت...
ئەو وێنانەی تەمەنێک یادگاریی
ڕەش و سپین...
تەمەنێک ژیان کردن لەو وەرزانەی
گەڵاکانی کەڕویان گرتووە
وێنەیەک لەتۆوە بۆمن بە ڕەنگی پەمەیی بچرکێنە
دەمەوێت لەم وێنەیەدا بچمەوە
ناو خۆم...تەنها خۆم ببینم
ترسم لەو وێنانە هەیە
حەقیقەتی ناوەوە بشێوێنێ
تارمایی بە جێبهێڵێ
تۆ وەرە هیچ شتێک وەک خۆی
بە جێمەهێڵە
هەرچی پارچەی شکاو هەیە
تەنها بە یەک ئامێز کۆیان بکەوە
بە مێژووی مرۆڤایەتیی بڵێ
من دەتوانم بە ماچێکی قووڵی لێوەکانمەوە ئەڤین بونیاد بنێم و گوێ لەو ئاوازە
غەمگینە بگرم کە هێشتا نەبیستراوە.
ئاواز سامان
(۱۷)
[فۆبیا]
من و تۆ؛
لە دوو هەسارەی، دوور لەیەکترین
هەردەم پەروانە ئاسا بەدوای یەکەوەین،
لە زەمەنێکی پڕ لە ترس و فۆبیادا
دەگەڕێین بۆ ئەو شوێنانەی،
هەرگێز گەڕانەوەیان بۆ نییە.
له زه‌مه‌نێکی پڕ له زام دا؛
هه‌توانەکانمان ئەو ھەموو ئاشقە دڵشکاوە تێر ناکات،
تۆ ئەگەر لێرەیت؛
وەرە چاوێک بەسەرکێشییەکانمدا
بگێڕە،
وەرە تیرێک، ئاهێک، نیگایەک لە جەرەبەزیم
بگرە
پاڵ بەو جۆلانەیەوە بنێ
کەلەبیابانێکدا سەرابی منی لەخۆ گرتووە،
بەئاسمانا هەڵمدەدا و بەرز و نزمم دەکاتەوە.
تۆ ئه‌گه‌ر لێره‌یت؛
وه‌ره پیاسه‌یه‌ک بکه به‌شه‌قامه چۆڵه‌کانی دڵمدا و
مۆمێک
بۆ مەرگی لە دایکبوونەوەم دابگیرسێنە
میوزیکێ لەسەر جەستەی من بژەنە
ئای نیشتمانم...
جێگایەکت نییە بۆ هەڵواسینی
ئەو تابلۆ سریاڵیانەی
بەخوێنی دڵ کێشراون,
بۆنی سارد و گەرمی ژیان و مەرگیان لێدێ،
نیشتمانم...
بۆ جارێکیش بیت ،ناونیشانم بده بە هه‌تاو،
با تیشکه‌کانی خۆی لە جەستەم بئاڵێنێ.
له‌شکری تاریکی،
له کۆڵانی خه‌ونه‌کانم ڕاوبنێ
یان ھیچ نەبێت؛
بەر بەو تیشکە حەرامزادانە بگرێ،
کە دەیانەوێ بمکەنە ھەڵم
بمدەنە دەم کزە بایەکی توڕەوە
ئەویش لە ھەورێکی باڵا پۆشی پڕ لە عەورەت
کۆمکاتەوە،
دڵۆپ، دڵۆپ، کەنیزە، کەنیزە
بمبارێنێتە کێڵگەی تەرمەکانی خەلافەتەوە!
نیشتمانم...
خۆ دەتوانی؛
تەنیا بۆ جارێکیش
وەک دڵی منداڵێکی بێ سۆز و بێ ناز،
دەستی ڕاستەت بەھێمنی بەسەرسەرمدا بھێنیت و بە دەستی چەپیشت توند توند بە سینگی خۆتەوەم بنوسێنی
با بۆ دڕندەکانی جوانی نەژاکێم.
وەرە نیشتمان
باوەشم لێ بگرە
بەڵێن بێ
چیتر لە چاوی ئومێدەوە
هەڵنەفڕم
(۱۸)
[من زمانمم]
من دەربەدەرکراوم لە زمانم
سلیم بەرەکات...
نوسەرە کوردە پەناهەندەکەی ناو زمانی عەرەبی،
ئەو نوسەرە مەزنەی کورد
توانی وشەو نەهامەتیەکانی و ناسنامەی کورد بە دنیای ئەدەبیاتی عەرەبی بناسێنی.فەرموون بە یەکەوە بینەری ئەو ڤیدیۆیە ٥ خولەکیە بین...
(۱۹)
[وشەکان]
وشەکانت
دەمبەنەوە بن سێبەری
هەیوانی خانووە کۆنەکان،
پڕن لە ژەنگی یادەوەرییەکان.
تۆ درەنگ کەوتی
هاتیت و
منت لە ئاوێنە شکاوەکەی خۆتدا بـینییەوە.
لە نێو پەڕاوە رەنگ زەردی شیعرەکاندا،
وشەت دەکردە چەپکە گوڵ و
دەتباراندە سەر جەستەی ژنانەم،
حەزم دەکرد لە گەڵتدا
سەما بکەم
لەسەر نووکی پەنجەکان
بە دەوری ڕۆحت دا بخولێمەوە
لە بەردەم ئەو هەیوانەی
ساڵانێک بوو
بۆنی تەنیایی لێ دەهات،
تۆ وەرە ببینە
ئازاری ئەو ژنەی کە ماکی رابردوو و
یادەوەرییە تاڵەکانی
لەو خانووە کۆنە جێهێشتووە،
تاڵەمووە وەریوەکانی
لەسەر شانی پەنجەرە نیشتووە
یەقین بە لەوەی دڵم توند
پەنجە شکاوەکان دەگریت و
دەست بنێیت بە دڵێکی بریندار.
ئاه
ساڕێژ بوون چەندە سەختە
لە زەمەنێک
دڵەکان پووچ و
تێکشکاون...
دە وەرە
تۆ دەتوانی لەو
جەنگڵستانە
ژنێک بناسیت و
ئەوین لە بەرد بنیاد بنێیت.
(۲۰)
[ڕۆژەکانم بە تۆ دەکەمەوە]
دەمەوێ بەر لەوەی بمرم
لەنێو لەپی دەستەکانتا
بمێنمەوە
لەشاری دڵتا
پڕمکەی لە خۆت
هەموو شتێک لەگەڵ تۆدا بەشکەم،
دەنگی ماچ
دەنگی دەف
دەنگی ئاو
تۆ تەنیاییت لەبەرگی خۆی دەرهێنا
ئایی تەنیایی
چەندە ترسناک بووی
دەستم بە لاقۆلێکی تۆوە دەگرت
نەبادا سێبەر ونم بکا!!
دەتزانی تاریکی کوشندەیە
بریسکەی چاوەکانت
ڕەنگە پەمەییەکەی لێوت
تاڵەسپییەکانی پرچت
هەموو ئەوانە ڕووناکی بوون
ئایی خودایە
قفڵی دڵەکان شکێندران
مەعشوقەکان تا بەرەبەیان
ماچیان گۆرییەوە و
ئاویزانی یەکتربوون
من تا نزیکتر دەبمەوە
زام و تەنیاییم ڕۆدەچێتە رۆحت
نەکەی بێ من لەنێو گوڵدانی ماڵەکان
بەتەنها خۆت حەشار دەی
کە نە تیشکی خۆر و
نە تامی ئەو قەترە ئاوە دەکا
کە لەسەر پەڕەی ئاونگی گوڵەکان دەمێنێتەوە
با بەیەکەوە
ڕۆژ ژمێری سەدەیەکی دیکە
بنەخشێنین،
ئەو مێژووە نەگریسە بگۆرین
کە لە زبڵخانەی ماڵە گەورەکان دەچێ
ئیدی باکم نییە
لەنێو تۆدا گیانم دەرچێ
یاخود نا.
گڵاڵەکردنی ئەم بابەتە: #زانا_کوردستانی
