بەشدار سامی
کاک "بەشدار سامی"، شاعیر و فۆتۆگرافەر، ساڵی ١٩٨٤ لە دایک بووە. لە دەنگە نوێیەکانی شیعری کوردییە و زیاد لە دە ساڵە دەنووسێت.
کاک "بەشدار سامی"، شاعیر و فۆتۆگرافەر، ساڵی ١٩٨٤ لە دایک بووە. لە دەنگە نوێیەکانی شیعری کوردییە و زیاد لە دە ساڵە دەنووسێت. تا ئێستا سێ کتێبی شیعریی چاپ کردووە: «سبەی ڕۆژێکی دیکەیە»، «ڕۆیشتن بە ئاراستەی مردووە بەڕێزەکان» و «ئەمڕۆ شەممەیە ئەگەر هیچ کێشەیەک ڕوو نەدات». لە نووسینەکانیدا بەردەوام هەوڵی داوە لە خۆی بدوێت و نیگەرانییەکانی دنیای تایبەتیی خۆی بکات بە شیعر.
(۱)
[لەبیرنەکراو]
لەنێو خەلکیدا خەلکی لەبیرنەکراوی من تۆیت
تۆیت کە دەبێت لە سەفەرمدا بیت
تۆیت کە دەبێت لە خەونمدا بیت
تۆیت کە دەبێت لە پێخەفەکەمدابیت
ژنانی دی ھی پیاوانی دیکەن
شەوانی ھاوینی گەرم ئەستێرەکان کەدەبینم و
بیر لە خەلکی خۆم دەکەمەوە
خەلکی من تۆیت
ژنانی دی خەلکی پیاوانی دیکەن
خەلکی من تۆیت
تۆیت لە رۆژێکدا پێنجھەزار جار پێتدەلێم
خۆشمدەوێیت و
خەلکی من تۆیت .
(۲)
[لە گوڵ دەترسم]
لە شەو دەترسم، لە نەخەوتن، لە دەنگ
لە خواردنه‌وه‌ی ئاو ده‌ترسم،
له به‌ته‌نیا چوونه‌سه‌ر ته‌ختی ڕاکشان
له یاده‌وه‌ری،
له ئه‌مڕۆ که تێ ناپه‌ڕێت
له شه‌و ده‌ترسم، له نه‌خه‌وتن و له ده‌نگ
له تاریکی، له هه‌ڵکردنی چرا و
له به‌ته‌نیا چوونه‌سه‌ر ته‌ختی ڕاکشان ده‌ترسم
له خۆشویستن ده‌ترسم
له ڕۆیشتن هه‌نگاوێک که دوور ده‌که‌وێته‌وه
له نه‌هاتنه‌وه ده‌ترسم
لە یادەوەری دەترسم، لە نەخەوتن،
لە مۆسیقا، لە شەو
له خۆشویستن دەترسم.
من تەنیام،
لە گوڵ دەترسم.
(۳)
[ئێوارەیەک لە هەولێر]
ده‌ست له‌نێو پاڵتۆ
به جاده‌کان
جاده دوورودرێژه‌کاندا ده‌ڕۆیشتم
زستان
باران
سه‌رما بوو
ده‌ست له‌نێو گیرفانی پاڵتۆدا
ده‌له‌رزی و
ترووسکایییه‌ک نه‌بوو خۆمی پێ گه‌رم بکه‌مه‌وه
ده‌ست له‌نێو پاڵتۆ
به جاده‌کان
جاده دوورودرێژ و سارده‌کاندا
ده‌ڕۆیشتم و
غه‌ریبتر له من له ده‌ره‌وه نه‌بوو
(۴)
[سەنگەر]
یه‌کێک، بیری دایکی ده‌کرد و
چاوی دەنوقاند تا کەزییەکانی ببینێت.
یه‌کێک، بیری ژنه‌که‌ی بە هەموو بۆڵەبۆڵەکانیشیەوە.
یه‌کێک بیری ئاژه‌ڵه‌کانی کە ئێواران لە شاخ دەگەڕانەوە.
یه‌کێک بیری شاره‌که‌ی بە هەموو پیاوە خراپەکانیشیەوە.
یه‌کێک بیری خواردنی ماڵه‌وه‌ی ده‌کرد و
یه‌کێیان ده‌گریا
چونکه که پووری مردبوو له‌وێ نه‌بوو
چه‌ند دانه‌یه‌ک بیریان له منداڵه‌کانیان ده‌کرده‌وه
به‌ر له‌وه‌ی بکوژرێن،
سەربازەکان.
(۵)
حەمەدەمین زۆر بێزار بوو
کاعەباسیش زۆر بێزار بوو
حەمەدەمین گوتی: کاعەباس لۆ بێزاری؟
کاعەباس گوتی: ئەدی حەمەدەمین، ئەتوو لۆ بێزاری؟
حەمەدەمین، سەری بادا
کاعەباسیش سەری بادا
حەمەدەمین گوتی: کاعەباس زۆر بێزارم
کاعەباس گوتی حەمەدەمین ئەمنیش زۆر بێزارم
حەمەدەمین لە داخی کاعەباس زۆر تووڕە بوو، جنێوی بە مەلا دا
کاعەباسیش لە داخی حەمەدەمین زۆر تووڕە بوو بەڵام جنێوی بە مەلا نەدا.
حەمەدەمین جگەرەیەکی پێ کرد
کاعەباسیش جگەرەیەکی پێ کرد
حەمەدەمین گوتی: کاعەباس تۆ منی؟
کاعەباس گوتی: ئەدی حەمەدەین تۆ منی؟
حەمەدەمین مستێکی لە کاعەباس دا
کاعەباسیش مستێکی لە حەمەدەمین دا
حەمەدەمین قژی کاعەباسی ڕاکێشا
کاعەباسیش قژی حەمەدەمینی ڕاکێشا
حەمەدەین گریا و گوتی: کاعەباس با کەسێک بدۆزینەوە ئاشتمانکاتەوە
کاعەباسیش گریا و گوتی: حەمەدەمین با کەسێک بدۆزینەوە ئاشتمانبکاتەوە
ئێستا حەمەدەمین بەدوای کەسێکدا دەگەڕێت لەگەڵ کاعەباس ئاشتی بکاتەوە
کاعەباسیش لەدووی کەسێک دەگەڕێت لەگەڵ حەمەدەمین ئاشتی بکاتەوە
(۶)
لافیتەیەک هەڵبواسن
پیاوێک گوتی خۆم دەکوژم
کاتژمێرێک
یان کەمێکی دیکه
تەرمەکەتان نەبینی
لێی کەنەوە
(۷)
[سپێده‌ی ئارام]
چام خواردووه‌ته‌وه، له‌تێک په‌نیر و
نانیش هه‌ڵبه‌ت
واتای ئه‌مه: هیچ کێشه‌یه‌ک بوونی نییه.
هه‌وا خۆشه
دره‌خته‌کان خه‌ریکن سه‌وز ده‌بن
هه‌موو شتێک گرنگه و
ڕوو له ده‌شت دانیشتووم
پیاوێک به جلی کوردییه‌وه تێبپه‌ڕێت
به ته‌ماشاکردنی بزه ده‌که‌وێته سه‌ر لێوم.
هێنده دڵخۆشم ده‌ڵێی ماستم به لێوی ژنێکه‌وه
بۆنی مێخه‌ک که‌پووم ته‌ڕ ده‌کات،
گرنگ نیه گه‌ردنی چ ژنێک تێده‌په‌ڕێت
پتر له‌وه که خه‌مگین نیم
خواستێکی ترم نییه.
گڵاڵەکردنی ئەم بابەتە: #زانا_کوردستانی
